說唱人生

人人的成長, 都經歷過不同的階段
每次變遷帶來更新的體驗
從前風光過, 玩樂過的好友不復在身旁
路一走遠了, 偶爾回首, 總感慨萬千
回到當天, 重新經歷過, 再去感受以前的美麗
時間永遠停在最歡樂的一刻, 不再流動, 那會多完美

在無數無數個旅程, 每每認識更多不同的人
遇到更大的挫敗, 更深的刺傷時, 才驚覺今天的人與事, 根本不值一提

每人都希望得到最好的環境
然而, 既已經歷過最好, 也還憾悔什麼呢?
得到過, 就是過去了也永留心中
尚且, 未嘗試過也不知道將來會否有更好的機會

過去, 現在與未來, 一直繞著人生的最大課題而走
只要記著,
不可能控制環境怎樣改變, 但對環境的反應感受, 是在你手
不可能操控身邊的人的性格, 也不能令所有人跟隨你的原則而行
但是, 每一個都可以選擇受與不受其他人的影響, 都可以選擇如何堅守自我的人生路

每一天, 每一晚, 都可以是再次開始, 重新出發的時刻
在乎能否抓緊機會, 認真思考自己的人生, 再一次擁抱已忘記的另一個自己

兩首說唱之歌, 題目只有一個, 就是每一個人所走的路, 艱辛而唏噓

--

細路哥II - 林海峰



旁白來自小克漫畫《Serious Series》

某一年一班剛剛考完會考嘅同學約埋一齊唱K，
流行曲唱到一半嘅時候，
其中一位朋友問咗隔離嗰位一個問題：
「喂！你估吓二十年後嘅今日我哋會變成一個咩人呢？」

二十年後…可能已經變成一個西裝骨骨嘅中環人，
手帶勞力士，銀包有好多張信用卡，
放工嘅時候就一齊響酒吧度，
一邊望住個煙灰盅，一邊就望住隔離檯嗰個女仔，睇吓佢條裙會幾時走光。

二十年後…大概終於會買左嗰部好想擁有嘅汽車，但係仲有二十幾期要供。

二十年喇…應該轉過好多份工，
識做嘅嘢越來越多，但係同時發覺學識越來越少。
響嗰個時間，間唔中可能會去吓gym，但係做嚟做去都係減唔到個肚腩。

當然二十年嚟你間唔中都會諗起一段一路都未能放低嘅感情，
女朋友越來越多，但係愛嘅越來越少。

（細路哥　你得到什麼　你失去什麼　你知道　what u are looking for）


大概響嗰個時候可能會有身邊嘅親人離開，
而響嗰陣時你會有好多講唔出口嘅遺憾，
同時間你發現原來人生已經過咗一大半。

同年終於結婚喇，
用咗半生嘅積蓄俾左一層樓嘅首期，有車位有泳池有會所，
娛樂越來越多但係快樂越來越少。

兩年後，可能會離婚，
回復單身之後嘅一個晚上一個人響床上面，
揸住個搖控不停咁轉台，食咗兩粒安眠藥，
跟住點起支薄荷煙然後流咗一滴自親人離世之後嘅眼淚。

突然之間你又諗起，響二十年前，你係一個咩人…
喺嗰一晚，一大班同學約埋出嚟唱Ｋ唱到天光，
仲記得喺嗰朝返到屋企嘅時候，
打開門響張檯面見到有一碗屋企人留低既湯，碗湯已經凍左嘞。

（細路哥　你得到什麼　你失去什麼　你知道　what u are looking for）

--

粒粒皆辛苦 - 農夫



再兜個圈 再轉個彎 天天有難度
再經過起跌高到低 先知粒粒亦都
再兜個圈 再轉個彎 幾千里長路
結婚戒指 變出世紙 先知粒粒亦辛苦

第一次擘大眼睇個世界嗰時
Daddy媽咪話做人唔容易
第一次學行跌左唔止一次
學123去到學ABC
啲考試每次都臨急至溫書
啲同學每個都曾經暗戀Missy
嗰時仲未知粒粒皆辛苦係一回乜嘢事

再兜個圈 再轉個彎 天天有難度
結婚戒指 變出世紙 先知粒粒亦辛苦

嗰晚 放榜前一晚 三點三十分都未訓
聽日有三分定係有十分
淨係知道有不同嘅學歷 有不同嘅人生 諗
攬住個枕頭 諗
揸住呢個分數 點樣面對老豆
即刻捐入被竇 冚 大被冚過頭
原來諗得多過頭
十九轉眼變左廿九
髮線開始向後 準備三十出頭

浮浮沉沉九年嚟冇份工做得長久
尋尋覓覓九年嘅女朋友終於分手
好多新朋友 喺街頭重遇舊朋友 唔知點樣問候
收到新朋友嘅喜訊
轉個頭 收到舊朋友嘅死訊
人生無常從來唔係幾信
一啖一啖酒灌落心頭
聽朝又八點九
一步一步走嘅一個一個年頭
為左走去盡頭
一粒一粒都係辛苦嘅 嗰日終於接受

過左兩年突然結左婚
朋友問做乜咁笨要做老襯
可能只係想搵個人一世一齊瞓
又或者係為咗賺筆人情去旅行
老婆話要盡責任 要秘密做人
好想問自己一問 俾唔俾BB出生
做左幾十年人好似苦多過甘

又要搵銀 又要忟癐 又冇幾多嘢值多開心
轉頭父母過身 朋友移民
以前落酒吧一班人
今日啲啤酒自己飲
飲到醉薰薰 涼風陣陣
幾辛苦都行咗大半個人生

終於 知道 (粒粒皆辛苦)
終於 知道 (粒粒皆辛苦)
終於知道 終於知道